පුංචි හිතකට සතුට බිඳක් ...........

"අපි කාගෙත් හිත් වල හීන ගොඩාක් තියෙනවා. අපි හැම කෙනෙක්ම හීන දකිනවා. ඒ හීන හැබෑ වෙන දවසක් එන කල් අපි බලාන ඉන්නෙ ඇඟිලි ගැන ගැන. ඒ හීනයක් හැබෑ නොවුණොත්, එහෙමත් නැත්නම් අපි දැක්ක ඒ හීන ලෝකෙ අපි බලන් ඉද්දිම කඩන් වැටුණොත් .....  අනිවාර්යයෙන්ම ඇස් වලට කඳුළු පිරෙනවා." මේ මගේම IMCD සොහොයුරෙක් එක් Needy Readers වැඩ සටහනකදි හීන ගැන කිව්ව හැටි. ඔව්, ඒ කතාව ඇත්ත. අපි හැමෝම හීන දකිනවා. ඒ හීන හැබෑ වුණොත් අපි සතුටු වෙනවා, ටිකක් නෙමෙයි ගොඩක් සතුටු වෙනවා. හීනයක් බොඳ වෙලා යද්දි අපි සමහරු කෑ ගහලා අඬනවා. තවත් අය නිහඬවම කඳුළු සලනවා.

අද මේ කියන්න යන කතාවෙ ඉන්නෙ අපි වගේම පිරිසක්. නමුත් ඔවුන්ට අපේ ලෝකය විතරක් නෙමෙයි අපි දකින හීනවත් දකින්න ඉඩක් නැහැ. මේ කතාවට ඔවුන් සම්බන්ධ වෙන්නෙ අපූරු විදිහකට. වසරකට වරක් අපි කොයි කාටත් උදා වෙනවා විශේෂ දවසක්. දුප්පත් පොහොසත් ළමා වැඩිහිටි හැම කෙනෙක්ටම. ඒ තමයි උපන්දිනය. කොයි තරම් නැති බැරි වුණත් පුළුවන් කමක් තියෙයි නම් වෙනදට වඩා විශේෂ කෑමක් බීමක් හරි තමන්ගේ දරුවට හදලා දීලා පුංචිවට හරි උපන්දිනේ සමරන්න හැම දෙමව්පියෙක්ම හීන දකිනවා.

ඉතින් ඒ වගේම තමයි මේ IMCD පවුලත්. මේ අක්කලා, අයියලා, නංගිලා, මල්ලිලා ටික නම් කාගේ හරි උපන් දිනයක් නම් එයාට සුබ පතලා විතරක් නම් නතර වෙන්නෙ නැහැ. පොඩිවට හරි සාදයක් පවත්වලා කාලා බීලා සතුටු වෙන එක පුරුද්දක්. ඔහොම යන කොට ආව අපූරු යෝජනාවක්. පුංචි හරි සාදයකට මුදල් වැය කරනවා වෙනුවට ඒ මුදල අපට වඩා සතුට ගොඩාක් අවශ්‍යම කෙනෙක්ට දෙන්න වියදම් කරමු කියලා. පුදුම වෙන්න දෙයක් නැහැ....... මේ සංවිධානය හදා ගෙන තියෙන්නෙ අපට අඩුවක් නැතිව තියෙන දේවල් ඒවා නැතිව ලැබෙන දවසක් එනකල් හීන දකින තවත් දරුවන් පිරිසක් එක්ක බෙදා හදා ගන්න කැමති පිරිසක් එකතුවෙලානෙ.

ඉතින් ඔන්න ඒ යෝජනාව දැන් ක්‍රියාත්මක කරන්නයි අපේ කට්ටියගේ සූදානම. සැප්තැම්බර්, ඔක්තෝබර් මාස වල උපන්දින සමරපු අපේ යාළුවො වෙනදා වගේ සාද වලට මුදල් වියදම් නොකර ඒවා එකතු කරලා හැදුවා පුංචි අරමුදලක්. දැන් ඊළඟට මොකක්ද මේ මුදලින් අපේ කට්ටිය කරන්න යන්නෙ?

ඔන්න හැමෝම එකඟ වුණා මේ මුදලින් විශේෂ අවශ්‍යතා සහිත දරුවන් ඉන්න නිවාසයකට ගිහින් ඔවුන් සමඟ දවසක් ගත කරන්න. අපේ ලෝකයෙන් දවසක් ඔවුන් එක්ක බෙදා ගන්න. ඉතින් එදාට ඒ කියන්නෙ ලබන ඔක්තෝබර් 18 වැනිදාට අපි යනවා ඒ ළමා නිවාසයට. ලොකුවට සාද පවත්වලා උපන්දිනය සමරනවා වෙනුවට ඔයලාට වුණත් පුළුවන් අපිත් එක්ක එකතු වෙන්න. අපිට වගේ උපන්දිනයක් සමරන්න, ඔවුන් මෙලොවට බිහි කරපු අම්මා තාත්තාවත් ළඟ නැතිව, හීනයක් දකින්නවත් ඉඩක් නැති ඒ පුංචි හිතකට සතුට බිඳක් තුරුලු කරලා එන්න පුළුවන් වුණොත් ඒ සතුට දවසක් දෙකක් නෙමෙයි ජීවිතේ පුරාම අපිත් එක්ක තියේවි.

Let's make them SMILE - Donor Information - Form
මෙන්න මේ යොමුවෙන් ගිහින් ඔබටත් පුළුවන් අපිත් එක්ක එකතුවෙන්න. පුංචි හිතකට සතුට බිඳක් හරි දීලා ලබන උපන්දිනය සුවිශේෂී එකක් කර ගන්න.

Categories: Amuzed

මගේ සිහින පාසැල| MY DREAM SCHOOL

"මට මේස් කුට්ටමක් ඕනේ" පුoචි දසුන් බිමට හරවාගත් හිසින් යුතුව බිඳුනු හඬින් එසේ පවසමින් ඉස්තෝප්පුවට ගොඩවී ගෙතුළට රින්ගුවේ කැඩුනු කොට බිත්තිය උඩ තිබූ නoගීගේ සුදු ගවුම් පොඩි දෙකෙන් එකක් අව්වේ වේලෙන්න දමමින් සිටි අම්මා පසුකරගෙන යමිනි.ඔහු යන දෙස ඇය ශෝකයෙන් බලා සිටියේ මුකුත් නොකියාමය.අඩුලුහුඩුකම් කොපමණ පැවතුනත් නිතර තම ඕනෑ එපාකම් කියමින් කරදර කරන පුරුද්දක් දසුන් ට කිසි කලකත් නොතිබූ බව ඇය හොඳහැටි දනී,තම පුතුගේ හිත හොඳටම රිදෙන යමක් අද පාසලේදී සිදුවී ඇති බව ඇයට නොඅනුමානය,ඇය සුසුමක් සැලුවේ නෙතට ආ කඳුළු බිඳු බිමට වැටෙන්නට නොදී ආයසයෙන් පිසගනිමිනි.ඇය දසුන් සොයා ගියාය.පොත් බෑගයද පසෙකට විසිකොට පැදුරු කඩමල්ල උඩට වැටී මුහුණ පසෙකට හරවා ඉකි ගසන තම කුඩා පුතු දුටු ඇයට හිත වාවගත නොහැකි විය.ඇය පුතු තම ඇකයට ගත්තේ ශොකය පිරි වේදනාවකිනි,නමුත් ඇය ඔහුගෙන් කිසිත් නොඇසුවාය අම්මාගේ උරෙහි මුහුණ හොවාගෙන පුoචි දසුන් නොනවත්වාම හඬන්නට විය.එසේ සෑහෙන වේලාවක් හැඬූ ඔහුට මහන්සියටම නින්ද ගියේය.පුතු පැදුරේ නිදිකරවමින් ගෙයින් එළියට පිවිස ඇය තම ස්වාමියා කුළියට බලන හරක් බාන දක්කන් ඒමට ඔහුට උදව් කරන රිසියෙන් දෙවැට දිග ඉදිරියට ඇදුනි.

නින්දේ උන් දසුන් තිගැස්සී ඇහරුනි, ඔහුට නොදැනී පසුදා අළුයම වීත් හමාරය.කඩි මුඩියේ ළිඳට ගොස් මූන කට සෝදාගත් ඔහුට කලින් දින කිසිවක් මතක නැතුවා සේය.හනික ලක ලෑස්තිවී පොල් සම්බල් සමග අම්මා බෙදා තිබූ බත් පිඟාන ඇය ලවාම බත් ගුලි සාදවා කවාගෙන, දෙදණ බිම ගසා අම්මාටත් අප්පච්චිටත් වැඳ ,පොඩි නoගිගේ අතින් අල්ලාගෙන දෙවැට දිගේ ඉස්කෝලෙට දුවන්නට විය. දෙවැට පසු කොට නියරට පිවිසි ඔහුට හමා එන මද නල වෙනදාට වඩා ප්‍රබෝධයක් විය.ඉස්කෝලය ලඟට පැමිනි පසු ඔහු නoගීගේ අත අතහැර වෙනදාමෙන් ඔහුගේ පන්තිය දෙස දුව යන්නට විය,පුදුමයකි වෙනදා තණකොළ තමන්ට වඩා මදක් උස නොවූ පිට්ටනියෙහි අද අමුතු ලස්සනකි,තණකොළ කපා ඇත,පිට්ටනිය කෙළවර තවත් ළමා උයනකි.එහි දැනටමත් තම පන්තියේ අනෙකුත් ළමයි සෙල්ලම් කිරීම ආරම්භකර ඇත.එකෙක් එක් පසෙකින් වූ පඩි කිහිපයකින් උඩට නැග අනෙක් පසෙන් ලිස්සා පහළට එයි, ටවුම ළඟ ඉස්කෝලෙත් ඔහු මෙවැනිම ලිස්සන පූරුවක් කලින් දැක ඇත,මෙය නම් පුදුමයකි ඉහ වහා ගිය සතුටින් ඔහුත් සෙල්ලම පටන් ගන්නට යත්ම ,පාසල ආරම්භ කිරීමට සීනුව නාද විය,දැන් ඔවුන් පෙළ  සෑදී උදෑසන රැස්වීමට යා යුතුය,ළමයි රොත්ත පිටින් රැස්වීම ඇති පෙදෙසට දුව යනු දුටු ඔහුත් ඒ හා ඇදෙන්නට විය, ඒ පාර ඔහු දුටුවේ ඉස්කොලේ ගේට්ටුව ළඟ තරමක් දිලිසෙන සුදෙන් යුතු වෑන් රථයකි කලාතුරකින් ටවුමට යන දිනක ඔහු මෙවැනි වාහන දෙස බලා සිටින්නේ ඉමහත් ආසවෙනි,මදක් නැවතී එදෙස බලා සිටි ඔහු දුටුවේ කලින් නොදුටු පිරිසක් මදක් විශාල පෙට්ටි කිහිපයකුත් ඔසවාගෙන ඉතා සිනාමුසු මුහුණින් යුතුව ගුරුවරුන් සිටින දෙසට ඇදෙන අයුරුය. ඔහු අනෙක් ළමුන් අතරින් ගොස් පෝළිමේ ඉදිරියේ සිටගත්තේ මේ වන්නේ කුමක් දැයි දැක ගැනීමටය, ඒ පිරිස අතර ඔහුගේ පියා වැඩ කරන වැඩ පළේ ඉන්නා ඉoග්‍රීසි පමනක් කතා කරනා සුදු මහත්තායා මෙන් වූ සුදු අයියලා අක්කලා කිහිප දෙනෙක්ද විය,අනෙක් අය නම් කොළඹ ,නුවර අයියලා අක්කලා බව විදුහල්පති තුමාගේ කතාවෙන් කියැවිනි. ඔවුන් පැමිණ ඇත්තේ දසුන්ලාට තෑගි බෝග අරන් බව විදුහල්පතිතුමා පැවැසූ විට ඔවුන් සතුටින් සිනාසෙන්නට විය.පිට්ටනිය අළුත් වීමට හේතුවත් ඔවුන් බව තව මිනිත්තු කිහිපයකින් ඔවුන් දැන ගත්තේය,කාලය ගෙවීයත්ම උදෑසන රැස්වීම අවසානයේ ඔවුන්ට ඇත්තෙන්ම තෑගි බෝග ලැබුනි.පුදුමයක මහත කලින් දින මේස් කුට්ටමක් නොමැතිව තැවුනු දසුන් හට තෑගි ලෙස අලුත් පොත් බෑගයක්ද,ලියන පොත් කට්ටලයක් ද සපත්තු කුට්ටමක් හා මේස් කුට්ටම් දෙකක්ද ලැබී ඇත.ඔහු ඉහ වහා ගිය ප්‍රිතියෙන් වට පිට බැලුවේ තමන් මෙන්ම  තෑගි දෙස බලමින් සතුටු වන අනෙක් ළමුන් දෙසය,ඔවුන් සමහරක් අයට පැන්සල් පෙට්ටි,පාට පෙට්ටිද ලැබී ඇත, ඒ සියල්ල සැමට නොවරදවාම පසුව ලැබෙන බව විදුහල්පති තුමා පැවසූවේය.පාසැල අවසන් වූ විගස ඔහුට නිවසට දුවන තුරු ඉවසිල්ලක් නැති විය ,තෑගි මල්ල දෝතින්ම රුවා ගත් ඔහු නoගී ට කලින් ගෙදර දුවන්න විය,තෑගි ලැබුනු පසුත් විසි වතාවක්වත් ඒවා එළියට ගෙන බලන්නට වූවත් ගෙදර ගෙන ගොස් අම්මාට පෙන්නන තුරු ඔහුට ඉවසිල්ලක් නැතිවිය , නියර උඩ නැවතුනු ඔහු පසු පසින් එන නoගී දෙසද බලා මදක් මහන්සි ඇරියේය,ඒ අතර ඔහුට අලුත ලැබුනු සපත්තු ජොඩුව නැවත එළියට ගන්නට සිත් විය,එය  රැගෙන මේස් කුට්ටම ද අනෙක් අතින් ගෙන හතර අතට හරවමින් පරිස්සමින් එහි හැඩ බලන අතර නoගි පිටුපසින් විත් සෙල්ලමට අතින් එල්ලුනාය,ජබුක් ශබ්දයක් සමග අතැතිවූ සපත්තුවක් හා මේස් කුට්ටම නියර පහළ මඩ ගොඩට වැටුනි,පුoචි දසුන්ට සිදු වූ දේ සිතාගත නොහැකිවිය ,ඇඬුම් අතරින් "අම්මා" යැයි මහ හඬින් ඔහුට කෑගැසිනි.. එවිටම අම්මා සුපුරුදු ලෙන්ගතු හඬින් "චූටි පුතේ ඇයි හීනයක් දැක්කාදැයි" අසන්නට විය,දසුන් සිටියේ පැදුරේ අම්මාට පසෙකිනි.

                                                 පුoචි දසුන් දුටු සිහිනය,සිහිනයක්ම ලෙස වියැකී යායුතුද? එවැනි වූ සිහින දකින අහින්සක පුoචි දසුන් ලා දාස් ගණනක් අප රටේ කොතෙකුත් ඉන්නවාද, ඉතින් එවැනි වූ දරුවන් පිරිස් දුටු අපේ රටේ නොවුනත් ,මිනිස්කමින් අපිටම නෑකම් කියන ජුලියා ස්වෙන්ඩෝවා   (Julia Svandova)ස්ලෝවැකියානු ජාතික තරුණියක්, ඇය අප රටට පැමිණි පසුව අප රටේ පිටිසර ගම් දනව් වල ඉන්න දසුන් වැනි කුඩා දරුවන්ගේ හිත්වල ලියවිලා තියෙන අහින්සක සිහින වලට පණ දෙන්න ඇයට කළ හැකි යමක් ගැන සිතන්නේ අනුකම්පාව පෙරදැරිවම නෙවේ නමුත් ලෝකයේ කොතැනක හිටියත් පුoචි හිත්වලට දැනෙන හීන සුන්දර බැව් ඇය දත් නිසාවෙන්ම විය යුතුයි,ඉතින් ඒ සිතුවිල්ලේ ප්‍රථිපලයක් ලෙස ඇය නැවතත් තම මව් රටට ගිහින් පුoචි දසුන්ලා ගේ සිහින සැබෑ කරන්න අවශ්‍යය අඩිතාලම සකසන්න ඊට අවශ්‍යය මූල්‍යමය ප්‍රථිපාදන  රැස් කරනවා, ඇයට ඇගේ රටින් කොපමණ සහයක් ලැබුනත් ඒ සඳහා අපේ රටෙනුත් මග පෙන්වීමක් මෙන්ම සහයක් අවශ්‍යය වෙනව ඉතින් එතනදි තමයි IMCD අපි ඇයත් සමඟ අත් වැල් බැඳ ගන්නේ.මේ සියල්ලේ ප්‍රථිපලයක් ලෙස MY DREAM SCHOOL ව්‍යාපෘතිය බිහි වෙනවා, මෙහි පරමාර්ථය වන්නේ දසුන් වැනි අහින්සක දරුවන් දකින සිහින පාසැල ඔවුන් වෙනුවෙන් සැබෑවක් බවට පත් කර දීමයි, මූල්‍ය ප්‍රථිපාදන අපේ විදේශික සොයුරියගෙන් ලැබුනත් මෙහි සියලූම කටයුතු සූදානම් කිරීමේ තෙක් අවසානයේ ඔවුන්ගේ සිහින සැබෑවක්  බවට පත් වන තෙක් වූ සියළු කටයුතු මෙහයවීම හා ඉටු කිරීම සිදුවන්නේ IMCD අපේම සොයුරු සොයුරියන් අතින්.මෙහි පළමු පියවර ලෙසින් අනුරාධපුර දිස්ත්‍රික්කයේ පිහිටි මහකනදරාව පාසල වෙත අවශ්‍යය පහසුකම් ලබා දෙන්න බලාපොරොත්තු වෙනවා. ඔක්තොම්බර් මාසයේ අවසාන දිනයකදී මෙය සිදු කරන්න දැනටමත් අපේ පිරිස යුහුසුළුව කටයුතු කරන බව පවසන්නේ ඉමහත් ආඩම්බරයෙන්, ඉතින් එදිනට මහකනදරාව විදුහලේ පුoචි දසුන්ලාගේ සිහන පාසැල සැබෑවක්ම බවට පත් වේවි.අවසානයේ තවත් එක් දෙයක් එකතු කිරීමට කැමැත්තෙමි, මෙලෙස ඇරඹෙන ඒ සoකල්පය ඉදිරියට ගෙන යාමේ වගකීම සතුවන්නේ ජූලියා සොයුරියටවත් ඇගේ හිත මිතුරන්ටවත් නොවනු ඇත, එය භාරවනුයේ මේ භූමියේ ඉපදී වැඩුනු මට හා ඔබටයි. ඉදිරියේදීත් අපි ,සිහින පාසැල තවත් එක් සිහිනයක් පමණක් නොවන්නට වග බලා ගනිමු.

                                                                                  - රිද්මි ඉලoගසිoහ

Categories: My Dream School

IMCD තවත් ශක්තිමත් වෙයි

“ඔබට ජිවිත කාලයටම සතුටු වීමට අවශ්‍ය නම් ඉදිරි පරපුරට සේවය කරන්න...”

මේ චීන කියමනක්....

ඕනෑම හොඳ දේකට හොඳ ආරම්භයක් අවශ්‍ය ය. සමාජය මඟින් සමාජය උදෙසා යන උදාරතර කර්තව්‍යය පෙරටු කරගෙන සමාජීය සංවර්ධනය උදෙසා වූ ජාත්‍යන්තර එකමුතුව බිහිවන්නේ ඒ සංකල්පයේ ප්‍රතිපලයක් ලෙසයි.

විශ්වවිද්‍යාල අධ්‍යාපනය නිම කළ..එමෙන්ම විශ්වවිද්‍යාල වල ඉගෙනුම ලබන විද්‍යාර්ථයන් රැසකගේ ස්වෙච්චා දායකත්වය මත ක්‍රියාත්මක වන IMCD එකමුතුව ආරම්භයේ පටන්ම ක්‍රියාත්මක වුනේ සමාජයට අපෙන් ඉටු විය යුතු වගකීම් වලට අර්ථයක් ලබා දීමේ අරමුණින්.  

ඒ 2012 වර්ෂයයි. තරුණ ජවයෙන් හා නවමු අදහස් වලින් පණ ලැබූ ඒ උදාර IMCD එකමුතුව තම මංගල ව්‍යාපෘතිය ලෙස “Needy Readers” ව්‍යාපෘතියට මුල් අඩිතාලම දමන්නේ ශ්‍රී ලංකාවේ දසත විසිර සිටින කියවීමේ සා පිපාසාවෙන් පෙලෙන නමුත් පොත් පත් හිඟ ,දැයේ මල් කැකුළු වල මුව මඩල සිනහවෙන් විකසිත කරවීමේ පරමාර්ථය සිත් තුල දරා ගනිමින්.

තම නිවෙස් තුල එකතු වී තිබූ පොත් පත් එකින් එක එකතු කරමින් කුඩා ඉලක්කයක් කරා ගමන් කරන්නට බලාපොරොත්තුවෙන් ආරම්භ කලත් Needy Readers සුවිසල් කප්රුකක් සේ අතු පතර විහිදෙන්නේ ලංකාවේ හතර දිග් බාගයෙන් මෙන්ම ලොව දස දෙසින්ද ලැබුණු පරිත්‍යාගශීලීන්ගේ සතුටුදායක ප්‍රතිපල සමගයි. රාජගිරිය සිරිහද විද්‍යාලය, තුන්නාන ශ්‍රී සුමනජෝති විද්‍යාලය ඇතුළු පාසල් 12කට පමණ කියවීම් පොත් 1000 පමණ බෙදා දෙමින් ආරම්භ වූ Needy Readers සමාජ සත්කාරය අද වන විට පාසල්, දහම් පාසල්, හමුදා කඳවුරු ඇතුළු සමාජ 39 කට පොත් 24,000 කට අධික ප්‍රමාණයක් ලබා දෙමින් දැයේ නැණස පැදීමේ සත්කාරයට තම දායකත්වය ලබා දෙයි.

2013 වර්ෂයේ IMCD දෙවන ව්‍යාපෘතිය වශයෙන් “Path To Wisdom” වැඩසටහන ආරම්භ වන්නේ 5 ශ්‍රේණිය ශිෂ්‍යත්ව මාර්ගෝපදේශන වැඩසටහන් සංවිධානය කරමින්.එතෙක් නාගරික පාසල් වලට පමණක් සිමා වී තිබූ ශිෂ්‍යත්ව සම්මන්ත්‍රණ අපි පැල්මඩුල්ල, ඔක්කම්පිටිය, බොරලන්ද ආදී දුර බැහැර ගම් දනව් වලටත් රැගෙන යන්නේ අසරණ දුවා දරුවන්ගේ මුවගට සිනහවක් කැන්දාගෙන ඒමේ අරමුණින්. 

ඒත් සමඟම ආරම්භ වන “Color a Dream” ව්‍යාපෘතිය මුල්‍යමය අවශ්‍යතා ඇති දැයේ දූ දරුවන් ශක්තිමත් කිරීමේ අරමුණින් මේ වන විට ඉතා සාර්ථක ලෙස ක්‍රියාත්මක වෙමින් පැවතීම සතුටට කරුණක්.

“කොළඹට කිරි ගමට කැකිරි” මිත්‍යාව දුරලමින් අපේ ගම්බද පාසල් වලට ආධාර ලබා දීමේ අරමුණින් ආරම්භ වූ  “My Dream School - මගේ සිහින පාසල” ව්‍යාපෘතිය මේ වන විට මහ කනදරාව වම් ඉවුර යාය 1 විද්‍යාලයට ඉගෙනුම් ද්‍රව්‍ය ආදී පහසුකම් රැසක් ලබා දීමට පිඹුරුපත් සකසාගෙන යනවා.

මෙසේ ක්‍රියාත්මක වූ අපි නව පණක් ලබන්නේ 2013 සැප්තැම්බර් මාසයේදී IMCD ආයතනය සමාජ සේවා  ස්වෙච්චා  සංවිධානයක් ලෙස නීතිමය වශයෙන් ලියාපදිංචි වීමත් සමගයි.

“මිනිසාගේ පරම යුතුකම මිනිසාට සේවය කිරීමයි”

ප්‍රසිද්ධ ලේඛක ලියෝ ට්‍රෝස්තෝයි ඒ විදිහට සටහන් කළා... IMCD ආයතනය මතුවටත්...මතු මතුවටත් මේ සමාජ සත්කාර කරගෙන යාවි...ඉතින් අපිත් සමාජය උදෙසා අපෙන් ඉටු විය යුතුකම් ඉටු කරමු.  

     

Categories: IMCD

අපි මහනුවරට ආ දින|Needy Readers Kandy Initiative

දිනය සැප්තැම්බර් 14, ස්ථානය Kandy City Center(KCC ) ,නුවරට එන වෙනදටත් KCC යට නොවරදවා ගොඩවෙලා යන්නේ අපි උවමනාවකටම නෙමේ,පුරුද්දට, ඇත්තටම ඒක අපිට පුරුද්දක් වෙලා,ඒත් එදා දවස ඊට ටිකක් වෙනස් මොකද උදේ රැයින් ඇහැරගෙන KCC යේ දොරවල් අරින්නත් කලින් ප්‍රධාන දොරටුව ඉස්සරහට ගිහින් හිට ගත්තේ වෙනදා වගේ පුරුද්දටම නම් නෙවේ, නමුත් හා හා පුරා කියල අපි කරන්නට යෙදුනු සුභ කටයුත්තක් වෙනුවෙන් ලක ලෑස්ති වෙන්න.ආයේ අටුවා ටීකා මොකටද මේ වෙන කිසි දෙයක් නෙවේ අපි අලුත පටන් ගත්ත IMCD මහනුවර පරිච්චේදයේ සුභ මොහොතින් ඇරඹුනු පළමු වෙන වැඩසටහන.දින ගනනාවක මහන්සියෙන් හැමෝම එකා වගේ වෙහෙසුනේ මේ දිනය උදාවනතුරු.ඉතින් මට පස්සේ අපේ පිරිසේ එක්කනා දෙන්නා කඩි මුඩියේ වැඩසටහන පටන් ගන්න තැනට ඇවිත් ඊට අවශ්‍ය සියලූ දේ සූදානම් කරා. අපි සිදු කරන්නට යෙදුනේ Needy Readers පිළිබඳ වූ ප්‍රචාරණ වැඩසටහනක්. මුලින් මධ්‍යම පළාත් අධ්‍යාපන අධ්‍යක්ෂක තුමාගේ හා මහනුවර කළාප අධ්‍යාපන අධ්‍යක්ෂක තුමියගේ ප්‍රධානත්වයෙන් පුoචි උත්සවාකරයකින් KCC භූමි පරිශ්‍රයේ අපිට ලැබුනු කුටිය ඉදිරියේ පොල් තෙල් පහන දල්වලා ,අපේ කටයුත්තේ සමාජ මෙහෙවර පිළිබඳ කතා කිහිපයකුත් පවත්වලා මේ කටයුත්ත ආරම්භ කරා. 

එතනින් පස්සේ තමයි අපි හැමෝටම මහඟු කාර්‍යයක් ඉෂ්ට සිද්ධ කරන්න තිබුනේ. IMCD යේ අපි දියත් කරන ප්‍රථම හා ප්‍රධානම ව්‍යාපෘතිය තමයි Needy Readers කියන්නේ එමගින් අපි ලoකාව ඉගෙන ගන්න ආස නoගිලා මල්ලිලා ඉන්න නමුත් ඒ සඳහා එතරම් පහසුකම් නොවූ පාසල්වල පුස්තකාල වලට අවශ්‍යය පොත් පත් ලබාදෙනව.ඉතින් අපිට කොහින්ද මේ පොත්?? මේ වැඩේ පටන් ගන්නකොටම නම් අපේ සාමාජිකයන්ගේ ගෙවල්වලම තිබූ කලෙක අපි භාවිතා කළ කියවා රස විඳි තව දුරටත් යමෙකුට භාවිතා කළ හැකි පොත් පත් එකතු කරල එවා පරිත්‍යාග කිරීම සිදු කළා නමුත් එතනින් පස්සේ අපිට සිදු වුනේ මහජනතාවගේ සහය පතන්න,ඉතින් සල්ලි ඇති පරිත්‍යාගශීලී භවතුන් අපිට මුදලට අලුතින්ම පොත් අරන් දුන්නත් අපි තවමත් අපේ කටයුත්ත ඉදිරියට ගෙන යන්නේ අපි එකතු කරගන්නා වූ පරණ පොත් පත් වලින්, පරණ වුනත් යමෙකුට භාවිතා කළ හැකි පොත් පත්.ඉතින් මේ අපේ කටයුත්ත කොළඹ ප්‍රදේශයේ පිරිස් නම් දැන හඳුනගෙන ටික කාලයක්, කොළඹ වගේම මහනුවර ජනතාව අතරත් මේ කටයුත්ත ප්‍රචලිත කිරිමේ අදහස තමයි 14 වන දින එලෙස KCC යේදී සිදු කරන්නට යෙදුනේ.ඒ සඳහා අපිට KCC භූමි පරිශ්‍රය කිසිදු අය කිරීමකින් තොරව නොමිලේම ලබා දුන් බවද ඉතාමත් ගෞරවයෙන් යුතුව මතක් කරන්න ඕනි.එදා අපි Needy Readers පවුලේ හැමෝම වගේ එකතු වෙලා හිටියා, අපි ගැන විස්තර සඳහන් වූ මුද්‍රිත පත්‍රිකාත් අතැතිව අපි KCC යට යනෙන හැම කෙනෙක්ටම අපේ කර්තව්‍යය පිළිබඳ අදහසක් ලබා දෙන්න උත්සහ කරා. 

චේතනාව යහපත් වූ නිසාමත් අපේ පිරිසේ අපූරු සහයෝගය හා කණ්ඩායම් හැඟීම නිසාමත් එදා හිතට දැනුන සතුට මෙතකැයි කියා නිම කළ නොහැකි වුනා,ඇත්තෙන්ම මට නම් ඒක ජීවිතයට අලුත් අත්දැකීමක් වුනා.14 වන දින උදේ 9ට ඇරම්ඹි මේ කටයුත්ත හවස 4 වනතුරු පැවතුනා, ඒත් මෙය එක් දිනයකින් අවසන් වුනේ නෑ 15 වන දිනත් ඒ ලෙසම මේ කටයුත්ත කරන්නට යෙදුන. කිව යුතුම දේ නම් මේ දෙදින තුළ අපි බලාපොරොත්තු වූවාටත් වඩා වූ යහපත් ප්‍රතිචාර ඒ ආ ගිය සැවොමගෙන් ලැබීමයි.අපිට සහයෝගය දැක්වීමට ඔවුන් සතුව පවතින පොත් පත් අපට ලබා දීමට ඉදිරිපත් වූ පරිත්‍යාගශීලීන් බොහොමයක් වුනා.එපමණක්ම නොවේ මේ දෙදින තුළත් අපි නොසිතූ අන්දමින් පොත් පත් 1500කට ආසන්න ප්‍රමාණයක් පරිත්‍යාගයන් ලෙස ලැබුනු බව පැවසිය යුතුමය. 

එලෙස පොත් පරිත්‍යාග කළ අය අතර දැන් මෙය කියවන ඔබත් ඇති. ඉතින් ඔබට බොහොම ස්තූතියි. ඒ පොත් පත් සියල්ල අපි මහනුවර ප්‍රදේශයේ තොරාගත් පාසැල් පුස්තාකාල කිහිපයකට ලබා දෙන්න දැනටමත් කටයුතු සූදානම් කරමින් පවතිනව.ඒ ගැන වැඩි විස්තර ඉදිරියට අපි සඳහන් කරන්නම්කෝ. කෙසේ හෝ වේවා සැප්තැම්බර් 14,15 දෙදින අපේ ප්‍රචාරණ වැඩසටහන එසේ සාර්ථකව නිමාවට පත්වුනා, මේ සාර්ථකත්වය පසුපස අපට නොමසුරු සහයෝගය ලබා දුන් දෙපිරිසක් හිටිය ඒ එක් පිරිසක් තමා KCC කාර්ය මණ්ඩලය අනෙක් පිරිස තමා SINGER LANKA ආයතනය. ඒ දෙදින තුළ අපේ ප්‍රචාරක වීඩියෝ පට නොමිලේම ප්‍රචාරය කිරීමට KCC හි SINGER ශාඛාව ඉදිරිපත් වූ බව මහත් ගෞරවයෙන් මතක් කළ යුතුයි.

අපි මේ යන ගමන කුමන බාධක මධ්‍යයේ වුවත් ඉදිරියටම යන ගමනක්, ඒ බැව් කල්තියාම හඳුනාගත්තෝ බොහෝමයක් දැනටමත් ඇති බව අපිට උදව් කිරීමට ඉදිරිපත් වන ගුණ සුවඳ දත් මිනිසුන්ගෙන් පැහැදිලි වෙනවා ,

ඉතින් ඔබටත් පුළුවන් අපිට සහය ලබා දෙන්න, පොතක් පිරිනමා අනාගතයක් එළිය කරමු. පොත් පරිත්‍යාගයන් සිදු කිරීමට අමතන්න මා මිතුරු අශාන් (077)4592275 (මහනුවර) නැත්නම් උපුල් (077)2517512 (කොළඹ ප්‍රදේශයේ  ඔබ අපේ උපුල් අයියා අමතන්න ),අපි ගැන වැඩි විස්තර දැන ගැනිමට Needy Readers පිටුවට හෝ IMCD වෙබ් පිටුවට පිවිසෙන්න.ඔබ සැමට ස්තූතියි!!!

-රිද්මිකා ඉලoගසිoහ

Categories: Needy Readers